Nagpanawagan ang grupo sang consolidated jeepneys sa pagpa-untat sa byahe sang jeepneys nga tubtob sa karun wala pa nakapa-consolidate.
Sa press conference nga ginpatigayon kaina sang aga sang grupo sang consolidated tradtional kag modernized jeepneys, ginpahayag sang pinuno sang Choret Corp., nga nagsabat sila gilayon sa luyag sang gobyerno nga magsulod sa Public Utility Vehicle Modernization Program, apang sa karun kaangay nga wala sila ginasuportahan sang gobyerno.
Suno kay Ma. Corazon Ocalinas, kapin sa tatlo ka tuig na sila nagsulod sa modernization program kag dako na ang ila nagasto para sa programa, samtang nagapadayon lang sa pagbyahe ang mga unconsolidated jeepneys.
Suno diri, makapila na gin-extend ang consolidation process kag iban ang ulihi na gid sa pagsunod sa programa.
Pahayag ni Ocalinas, sila nga nagsuporta sa modernization program ang wala nakabatyag sang suporta halin sa gobyerno.
