Suguran subong nga bulan ang construction sang Balay Silangan sang ciudad sang Sipalay.
Ang Balay Silangan ang nagaserbe nga drug rehabilitation center sang isa ka local government unit kag ini ang kinahanglanon agud nga madeklarar nga drug-cleared ang isa ka LGU ukon ang barangay.
Sa interview sang Bombo Radyo kay Philippine Drug Enforcement Agency Negros Occidental head Nicholas Gomez, ang Balay Silangan sang Sipalay ang ipahamtang sa Barangay Mambaruto kag ginalauman nga matapos sa masunod nga bulan.
Ang Sipalay ang magapatindog sang bag-o nga building para sa Balay Silangan kag ini ang maka-accommodate sang 30 ka persona sa isa ka bulan nga rehabilitation program.
Ang mga anay drug user, pusher kag convicted nga nag-avail sang plea bargaining agreement ang nagapaidalom sa physical, mental kag psychological reformation sa Balay Silangan.
May yara man sang livelihood program nga ginatanyag sang Technical Education and Skillss Development Authority (TESDA) kag Department of Trade and Industry.
Nagalaom naman si Gomez nga magadamo pa ang mga LGUs sa Negros Occidental nga makapatindog sang Balay Silangan.
Suno sa PDEA official, nagahulat lang sila sa request para sa ocular inspection.
Ang bakante nga building suno kay Gomez ang sarang maconvert bilang Balay Silangan ukon sarang man nga makapatindog sang bag-o nga building ang LGU.
