Nagapadayon pa ang imbestigasyon sang Bacolod Police Station 9 agud matumod ang nagbuho sa salog sang isa ka supermarket sa Purok Providence, Brgy. Sum-ag, Bacolod City sang Miyerkules sang aga.
Sa interview sang Bombo Radyo Bacolod kay Police Captain Michael Tuburan, station commander sang Bacolod Police Station 9, wala pa sila sang identity sang mga nagbuho sa salog kag nagtuyo nga magsulod sa isa supermarket sa nasambit nga lugar.
Suno kay Tuburan, ginalantaw nila nga tatlo tubtob apat ka mga persona ang nagbuho sang salog bangud sa nakita nila nga mga gamit.
Suno diri, wala man nakasulod sa supermarket ang mga nagbuho sa salog bangud alas-11:00 pa lamang sang gab-i naalerto na ang tanan nga mga gwardiya paagi sa radio communication bangud nabatian na nila ang nagapamukpok.
Nakita naman sang mga gwardiya nga may litik na ang salog sang supermarket nga ila ginadutyhan.
Ginlantaw man sang mga kapulisan ang buho kag nakita nga may hydraulic jack kag ila man natukiban nga may kanal pa gwa sa Sum-ag River kun sa diin narecover ang mga gingamit sang mga ini.
Una naman nga bes sa area sang Police Station natabo ang nasambit insidente kag wala man ini sang background kun may kaangay nga natabo sa iban nga lugar.
Nagpanugyan man si Tuburan sa mga gwardiya kasubong man sa mga pumuluyo nga kun may yara sang manotisyaran nga daw indi amo sa palibot magtawag sa mga otoridad agud marespondehan.
