Ginapanawagan sang convenor sa Water Watch Negros kay Bacolod City Mayor Alfredo “Albee” Benitez nga islan ang mga Board of Directors sa Bacolod City Water District (BACIWA).
Sa interview sang Bombo Radyo Bacolod kay Wennie Sancho, unprecedented ukon karun lamang natabo nga ang ciudad sang Bacolod ang nagpatigayon sang massive water propagation.
Pahanumdom sini nga responsibilidad sang BACIWA Prime Water ang paghatag sang nagakaigo nga supply sang tubig sa mga Bacolodnon.
Apang sa karun, ginakwestyon ni Sancho kun ang BACIWA ang Government Owned and Controlled Corporation (GOCC) gihapon ukon sila ang pribado na nga kompanya?.
Dugang pa sini nga ginatawag Joint Venture Agreement (JVA) ang pagtake-over sang Prime Water apang wala ini sang may nakita nga ginpasulod nga kapital, indi kaangay sa Prime Electric nga nagpasulod sang P2.5 billion nga investment para sa JVA sa Central Negros Electric Cooperative (CENECO).
Panawagan ni Sancho sa alkalde nga pang-islan na ang mga Board of Directors sang BACIWA nga amo ang nagpasar sang resolusyon para sa JVA, bangod sila ang wala man sang nahimo nga kaayuhan kag lunsay problema kag palas-anon lamang ang nahatag sa mga member-consumer.
Panindugan sini, nga sa Bacolod City lamang makakita nga ang local government unit (LGU) ang nagapangita sang tubig para sa mga Bacolodnon apisar nga may nanarisari nga management sa BACIWA kag Prime Water.
Dugang pa sini nga bisan eksplinasyon wala makahatag ang BACIWA Prime Water.
Panindugan ni Sancho nga dapat maghimo ang mga ini sang kongreto nga tikang agud masabat ang mga concern sang publiko bangod ang kahalitan sang ginakulang nga water supply ang wala lamang naga-apekto sa pamalay, kundi subong man sa mga negosyo.
Dugang pa sini nga sa tion sang pagbrown-out sa masami lubog ang tubig nga nagagwa sa gripo sa pagbalik sang kuryente, nga nagatuga sang water wastage bangod kinahanglan pa nga patuburon antes magtin-aw ang tubig.
Panindugan ni Sancho nga dapat ipahangop sang BACIWA Prime Water sa mga konsumedor ang problema bangod sila ang nagabayad, kag dapat nga nakahibalo.
Panawagan man sini sa mga Board of Directors sang BACIWA nga kun may nabilin pa nga delikadesa, dapat nga magpanaog na sa pwesto kag ini ang ihatag sa mga kwalipikado kag may ikasarang sa pagserbisyo.
