Gin-athag sang chairperson sa Committee on energy and public utilities sa Sangguniang Panlungsod sang Bacolod nga nagabayad ang Bacolod Bulk Water Inc. sang penalties bangod sa indi paghatag sang commitment nga supply sang tubig sa Bacolod City Water District, apang panindugan sini nga indi bayad sa penalty ang kinahanglan sang mga Bacolodnon kundi tubig.
Sa interview sang Bombo Radyo Bacolod kay Councilor Claudio Jesus “Kalaw” Puentevella, gin-athag sini nga deretso sang mga member consumer nga mahibaluan ang sitwasyon sang kontrata sa tunga sang BACIWA kag Prime Water.
Sa nakaligad nga public hearing, may admission na sa Prime Water angod sa kakulangan sa supply, apang panindugan sang mga ini nga ang kapaltahan ang gikan pa sa kontrata sang BACIWA sa Bacolod Bulk Water Inc sang sila ang wala pa nakasulod sa joint venture agreement.
Panindugan ni Puentevella nga wala mahatag sang duha ka bulk water supplier ang commitment nga tig-30 million liters per day (mld).
Pahayag sang konsehal nga tuman na tani ka dako ang 60 mld nga adisyunal nga water source apang ini ang wala man nagtupa.
Sa karun ang mga bulk water supplier ang nagabayad sa BACIWA sang 50 percent nga penalties gikan sa ila commitment nga nagadangat sa P2.4 million.
Apang panindugan ni Puentevella nga indi ang bayad sa penalties ang kinahanglan sang publiko kundi ang dugang nga supply sang tubig.
Ginsumada man sini ang P2.4 million sa isa ka tuig nga makahatag lamang sang P35 nga rebate para sa tanan nga member-consumer.
Samtang ang sadto pondo nga kwarta sang BACIWA nga yara sa P90 million tubtob P100 million ang karun nagpanaog na sa P20 million tubtob P30 million.
Panindugan sini nga dapat magpangita sang supplier nga may ikasarang gid sa pagsupply bangod kun indi mahatag ang commitment ang publiko lamang ang maga-antos.
