Isa ka Frenchman ang nag-apela sa mga kawatan nga nagkawat sang iya credit card para magbakal sang lottery ticket, nga tungaon ang masobra sa P30 million nga jackpot nga nadaogan sang duha ka kawatan.
Nadiskubrehan ni Jean David nga ang bag sini kun diin niya ginbutang ang iya wallet ang ginkawat halin sa iya salakyan.
Apang, antes pa man sini macontact ang banko para ipasira ang iya tanan nga credit cards, may naggamit na sang iya card para magbakal sa isa ka store.
Sang ginbisita sini ang store, didto niya nahibaluan nga gingamit sang duha ka kawatan ang iya card para magbakal apang wala sila nakahibalo sang PIN.
Ginkakibot ni David nga isa sa scratch lottery tickets nga ginbakal sang mga kawatan ang nagdaog sang P30,331,500.
Suno sa abogado ni David, wala sang problema sa iya kliyente nga tungaon ang kwarta sa duha ka kawatan bangod indi man nila maclaim ang premyo kun wala ang orihinal nga nagapanag-iya sang card.
Suno pa sa abogado, tuman ang kalipay ni David nga nakawat ang iya credit card sa sini nga tion samtang isa man ini ka oportunidad para sa duha ka kawatan para bag-ohon ang ila kabuhi.
