Yara na sa kustodiya sang 15th Infantry Battalion sang Philippine Army sa Brgy Manlucahoc, ciudad sang Sipalay, Negros Occidental si Sergeant Charlemagne Nabejet nga amo ang nagluthang-patay kay Corporal Arnold Sumaribus sa sulod sang military detachment matapos nga nag-inom inom sang Lunes sang gab-i.
Sa interview sang Bombo Radyo Bacolod kay Brigadier General Joey Escanillas, commander, 302nd Infantry Brigade sang Philippine Army, padayon pa ang imbestigasyon sa matuod nga natabo.
Si Nabejet ang mahimo nga pasakaan sang criminal case apang samtang nagapadayon pa ang imbestigasyon sang militar, siya ang posible nga pasakaan man sang administrative case.
Suno kay Escanillas, si Nabejet ang naka-detain sa 15th Infantry Battalion kun sa diin siya ang ginagwardyahan nga indi makalagaw-lagaw.
Pahayag ni Escanillas, hugot nga ginadumilian ang pag-inom sang makahulubog nga ilimnon bisaan ano pa nga okasyon sa sulod sang military detachment bangod ini ang maka-apekto sa ila trabaho.
