Mahina ang lakat sang negosyo sa Bacolod City Puclic Plaza kadungan sa selebrasyon sang 45th Masskara Festival.
Sa interview sang Bombo Radyo sa vendor nga si Mary Jean Saboso, residente sang Molocaboc Island sa ciudad sang Sagay, pito sila ka mga manugbaligya ang nagbyahe gikan sa isla padulong sa ciudad sang Bacolod agud ibaligya ang ila produkto nga mga bag, uga kag mga shells nga pang-disenyo.
Suno diri, nagabalor sang P150 tubtob P400 ang ila ginabaligya nga shells apang kun kaisa gina-ayo ang presyo sa ila kag ginabaligya na lamang sa manubo nga balor agud nga may yara sila sang pambakal sang pagkaon.
Sa sulod sang isa ka adlaw, humalin alas- 4:00 sang hapon nga pagpwesto nila, mahimo lamang nga isa lang ang ila costumer.
Suno kay Saboso, isa na ka semana ang ila pagbaligya sa plaza apang mahina ang negosyo bangod sa maulanon nga panahon.
Ginalauman sini ang maayo nga tiyempo antes matapos ang selebrasyon sang Masskara Festival agud may yara sila sang madala nga kwarta papauli sa ila.
