100 percent ang pagsalig ni Defense Secretary Gilbert “Gibo” Teodoro sa pagka-lehitimo sang military operation nga nakapatay sang 19 ka miyembro sang New People’s Army sa Brgy Salamanca, Toboso.
Ini ang ginpahayag sang tiglikom sang Department of National Defense kasunod sang pagcourtesy call kay Negros Occidental Governor Eugenio Jose “Bong” Lacson.
Una sini nga ginpasalamatan ang gobernador kag mga local government units nga padayun nga nagapakita sang suporta sa Armed Forces of the Philippines humalin sang natabo ang engkwentro, tubtob sa paggwa sang nagkalainlain nga issue.
Apang panindugan ni Teodoro nga mandato sang Philippine Army ang makigbato sa mga armado nga elemento, kag natabo ang engkwentro kasunod sang complaint sang mga pumuluyo.
Nagapati ini nga ang mga naratibo nga anom sa 19 nga napatay ang indi NPA kundi mga sibilyan, ang propaganda lamang sang makawala nga grupo agud makakuha sang dugang nga fundings partikular na sa mga foreign sources.
Gin-athag man sini nga secondary lamang ang resulta sang paraffin test, bangod ang mas mabakog nga ebidensya amo ang testamento sang mga direct participants.
Nahibaluan nga 11 lamang sa 19 nga napatay ang nagpositibo sa gunpowder nitrate.
Pahayag ni Teodoro, nga mahimo iban sa mga ini ang nakagloves sang nagpalupok, ukon nahinawan na ang ebidensya matapos mabasa sa fishpond, ukon napalid sa lain nga dereksyon ang pulbora bangod sa hangin, kag mahimo man nga wala gid man nakapalupok apang naga-uyat sang armas.
Pahayag sini nga ang pagreport sang mga pumuluyo sa NPA ang resulta na sang ginahimo sang mga ini nga pagpamatay sang mga sibilyan.
Sa pihak nga bahin, indi naman kinahanglan ang peace negotiation, bangod ang gobyerno ang may mga nakaplastar naman nga programa nga nagabatun kag nagahatag pa sang suporta sa mga magasurrender nga rebelde.
Samtang, ginklaro sang tiglikom sang Department of National Defense nga indi na pag-ibalik sang gobyerno ang peace talks sa New People’s Army, sa baylo ginpanawagan sini ang pagsurrender kag pagbaton sang mga programa nga ginahatag sang gobyerno.
Kadungan sa pagcourtesy call ni Defense Secretary Gilbert “Gibo” Teodoro kay Governor Eugenio Jose “Bong” Lacson sa Negros Occidental Provincial Capitol Lagoon, gingamit man sini nga tyansa ang makadali nga pag-atubang sa media agud magpanawagan sa mga nabilin nga miyembro sang rebelde nga grupo.
Ginpahayag sini sa mga NPA nga sila ang ginagamit lamang sang mga gintawag sini nga “manug-gamo” kag mga “sabad” sa sosyodad.
Nanindugan man ini nga indi na kinahanglan ang peace talk sa mga rebelde, bangod ang gobyerno ang may mga programa na para sa mga nagasungka.
Pasalig sini sa mga NPA members nga bukas ang gobyerno sa pagbatun sa ila nga pagbalik, kaupod ang paghatag sang bulig kag proteksyon.
