Indi madayon ang demolition sa 27 ka mga informal settlers sa Barangay 2, Bacolod City.
Ang mga ini ang gintumod sang Bacolod City Legal Office kag Bacolod Housing Authority nga kinahanglan nga i-demolish bangud ang mga balay ang yara gid sa creek.
Sa interview sang Bombo Radyo Bacolod kay Bacolod City Legal Officer Atty. Karol Joseph Chiu, naplastar naman sa tanan nga mga apektado sang demolition ang mga bulig sang City Government kaangay sang relocation kag financial assistance.
Suno kay Chiu, liwat sini nga ginplastar ang mga requirements kag maayo man ang response sang mga pumuluyo.
Wala anay gindayon ang demolition bangud naga-ayo ang mga pumuluyo nga mahatagan sila sang tion agud nga makaproseso sang ila papeles kag makuha ang cash assistance.
Ini agud man nga may yara sila sang gamiton sa pagpasad sang ila balay nga sayluhan.
May nag-ayo man nga magpabilin apang ginpaathag man sang City Legal Office nga indi sila mahimo nga magpabilin sa danger zone bangud ginalikawan ang mga insidente kaangay sang nabilin nga bata sa isa ka balay nga nahulog sa suba.
Dugang pa sa rasun nga wala gindayon ang demolition bangud sa holiday season.
