BACOLOD CITY — Nagnubo ang kaso sang dengue sa kalabanan nga mga ciudad kag banwa sa palibot sang probinsya sang Negros Occidental subong nga tuig kun ikumparar sang nagligad nga tuig.
Ini ang base sa data nga ginpagwa sang Provincial Health Office humalin sang Enero 1 tubtub Agusto 12 subong nga tuig kun ikumparar sa kaangay nga period sang nagligad nga tuig 2016.
Nagapanguna sa may pinakamadamo nga kaso ang ciudad sang San Carlos nga may 246 dengue cases kag ini ang mas mataas kun ikumparar sang nagligad nga tuig nga may 138 ka mga kaso.
Apang magluwas sa San Carlos City, nagnubo na ang numero sang suspected dengue cases sa iban nga LGUs.
Ini ang kaangay sang nagapangaduha nga ciudad sang Bago nga may 202 ka mga kaso kun ikumparar sa 250 sang nagligad nga tuig.
Nagapangatlo ang ciudad sang Silay nga may 162, mas manubo sa 291 sang tuig 2016; nagapang-apat ang ciudad sang Kabankalan nga may 156, mas manubo sa 233 sang nagligad nga tuig; samtang nagapanglima ang Sagay City nga may 137 ka mga kaso apang ini ang mas mataas sa 77 nga narekord sa kaangay nga period sang nagligad nga tuig.
