Nagapahanumdom ang Department of Education division of Bacolod City sa mga pampubliko nga Elementary kag High Schools nga indi kinahanglan nga engrande ang graduation, moving up ukon completion ceremony.
Sa interview sang Bombo Radyo Bacolod kay Lilia Vaflor Arro, public information officer sa DepEd – Bacolod, may gindagdag na nga DepEd memorandum nga nagapahanumdom nga wala dapat sang extra expenses para sa mga ginikanan kag indi man required nga magtoga.
Pahanumdom sini nga ang graduation rights ang dapat mapatigayon sa Mayo 29 tubtob 31 kag indi mapatemprano ukon maglapaw.
Bangod wala nadala sa maintenance and other operating expenses (MOOE) ang year book, sarang naman makadesisyon ang Parents-Teachers Association (PTA) apang indi dapat maangot sa mga manunudlo ang koleksyon.
Pahanumdom man sini nga voluntary lamang ang pagkuha sang yearbook kag wala dapat sang pilitay.
Samtang, preparado naman ang mga buluthuan sa Bacolod City sa patigayunon nga commencement, recognition kag moving up exercises.
Sa interview sang Bombo Radyo kay Richard Gelangre, presidente sang Bacolod City Public School Teachers Federation kag principal sang Bacolod City National High School, by batch ang pagpatigayon sang ila mga aktibidad sa Mayo 29 tubtob Mayo 31 bangud sa tuman kadamo sang mga estudyante.
Suno kay Gelangre, sila ang nagasunod man sa mandato sang DepEd nga uniform na lamang ang pagasuksukon kag wala na sang engrande pa nga mga selebrasyon.
Samtang, gindula naman ang clearance signing gani indi na kinahanglan nga magpaperma ang mga estudyante sini sa mga manunudlo agud nga makuha ang ila mga cards.
