Ginahulat pa sang pinuno sang Bacolod Traffic Authority Office ang sabat sang City Legal Office angot sa status ni BTAO Deputy Head Jojo Robello bangud ini ang magapadulong sa Estados Unidos.
Sa interview sang Bombo Radyo Bacolod kay BTAO HEAD Patrick Leonard Lacson, nalipay man sila ni Bacolod City Mayor Alfredo Albee Benitez sa ginbulig ni Robello sa pagdeliher sang trapiko.
Suno kay Lacson indi man ini kuntani magpasugot nga magresign si Robello apang kinahanglan niya ini nga himuon bilang delikadeza bangud ini ang magabiyahe sa malawig nga tinion.
Apang gin-athag ni Lacson nga ila pa ginahulat ang sabat sang City Legal Office sa estado ni Robello kun bala mahimo maka ‘leave’ ukon magaresign gid bangud may plano ini nga magbalik sa BTAO sa Hulyo 2024.
Una nga ginpahayag ni Lacson nga iya ginapangabay si Robello nga ikonsiderar ang desisyon nga pag resign.
Suno kay Lacson, nagcommit sa iya si Robello nga indi maghalin sa BTAO kag padayon nga magabulig sa traffic management.
Samtang, temporaryo nga gindesignar ni BTAO Head Patrick Lacson si retired Police Joey Resuma bilang iya nga assistant.
Si Resuma malawig na nga contractual worker sa BTAO, may maayo nga track record kag may ihibalo sa local kag traffic laws.
