Ginapreparahan karon sang Department of the Interior and Local Government (DILG) Bacolod City ang palaabuton nga regional validation kag assessment sang road clearing operation 2.0 nga natalanaa sa Enero 18 tubtob 22, 2021.
Madumduman nga ginhatagan sang DILG sang 60 ka adlaw ang mga local government units (LGUs) agud liwat magpanghawan sang mga dalanon nga nagsugod sang Nobyembre 16, 2020 kag magatakop sini nga Enero 15, 2021 matapos ini nasuspinder sang pito ka bulan bangud sa coronavirus pandemic.
Suno kay DILG-Bacolod head Ma. Joy Maredith Madayag, padayon karon ang ila nga preparasyon para sa palaabuton nga regional validation.
Apang nagahulat pa sila sang mando bangud sa posible nga extension sini tungod sa mga holidays sang Disyembre.
Suno sa iya, padayon ang ila nga mando sa mga barangay nga mag-comply sa road clearing operations kaangay na lamang sa pagpanghawan sang mga road obstructions kag illegal structures.
Samtang, iya naman ginkumpirmar nga si Barangay 10 first barangay kagawad Melvin Bravo ang magabulos sa nagtaliwan nga si Punong Barangay Dexter Yap.
Nahibaluan nga si Yap ang ginbawian sang kabuhi sang Domingo sa edad nga 59 bangud sa cardiac arrest.
Depende naman suno kay Madayag kun sin-o ang ila nga igarekomendar kay Bacolod City Mayor Evelio Leonardia nga mangin number 7 kagawad.
