Ginwelcome si Department of Transportation Secretary Vivencio “Vince” Dizon sang grupo sang mga unconsolidated traditional jeepney drivers and operators sa iya paghinun-anon kay Bacolod City Mayor Alfredo “Albee” Benitez sa Bacolod City Government Center.
Si Dizon ang nag-abot kapin alas-8:30 kaina sang aga upod ang mga Regional Directors sang Land Transportation Office (LTO) kag Land Transportation Franchising and Regulatory Board (LTFRB).
Antes masaka sa Office of the Mayor, naghapit si Dizon sa mga transport sector nga nagwelcome sa iya.
Ang grupo ang ginpangunahan nanday Rudy Catedral sang Bacolod Alliance of Commuters, Operators and Drivers (BACOD) kag Lilian Sembrano sang Kabakod Negros Transport Coalition Incorporated (KNETCO).
Nagpabutyag ang mga ini sang concern, kag nagpasalig naman si Dizon nga ila ginatun-an ang mga ginapadangat nga reklamo.
Gindaho man sini ang petition letter kag iban pa nga dokumento gikan sa transport group.
Pila sa gintalakay sa meeting amo ang nahanungod sa Public Utility Vehicle Modernization Program, status sang Consolidation process kag ipresentar man ni Mayor Albee ang tatlo ka bag-o nga Local Public Transport Route Plan (LPTRP) para sa Electronic Jeepneys nga ginatawag ‘green routes.
