Ginpahayag sang Department of Public Works and Highways (DPWH) nga nagpasa ini sang dugang nga pangalan sang mga high profile individuals sa Office of the Ombudsman angot sa ginaalegar anomaliya sa flood control projects sa Bulacan kag Davao Occidental.
Suno kay Public Works Secretary Vince Dizon, natalana nga maghimo sang anunsyo ang Ombudsman angot diri subong nga semana.
Ginpahayag ni Dizon nga nagpasa sila sang manifestations duha ka semana na ang nakaligad kag may duha sila ka bag-o nga manifestations nga ginpasa sa Ombudsman.
Magluwas diri, nagaplano ang DPWH nga magsumiter sang dugang pa nga manifestation sa Ombudsman subong nga semana angot sa kaso sa Cebu.
Dugang pa ni Dizon nga nagapadayon ang DPWH sa pagpakig-angot sa Ombudsman angot may imbestigasyon sa maanomaliya nga flood control projects.
