Padayun nga ginabulong sa ospital ang driver kag 11 ka pasahero sang elf truck nga natumba matapos mahulog sa kalog sa Barangay Matab-ang, Talisay City pasado alas-10:00 kagab-i.
Sa interview sang Bombo Radyo Bacolod kay Police Lt Col Alvin Christopher Baybayan, hepe sang Talisay City Police Station, bag-o lamang nakasweldo ang mga biktima nga mga nagatrabaho sa kampo, gani sila ang nagdesisyon nga mag-inom inom.
Sila ang gikan sa Manaloto kag nagabyahe na kuntani papauli sa Brgy Bagtic, Silay City.
Suno kay Baybayan, madasig ang padalagan sang driver nga si Jimmy Poral, 67 anyos, gani ginsaway pa ini sang mga kaupdanan nga maghinay-hinay lamang.
Apang pagdangat sa lugar, ang driver ang nag-overtake sa isa ka karo.
Wala sini matalupangdan nga may sugata nga motorsiklo gani hinali man nga ginawarik sang 67 anyos nga driver ang manebela kag wala na makontrolar.
Ang elf truck ang nagbunggo pa sa poste tubtob nga nagderetso sa kalog nga nagresulta sang pagkatumba.
Ginapakamaayo naman ni Baybayan nga nangin madasig ang pagresponder sang Talisay City Disaster Risk Reduction and Management Office kag narescue ang mga nagkalapilpilan.// Sila ang gilayon nga gindala sa Teresita Lopez Jalandoni Provincial Hospital.
