BACOLOD CITY – Patay ang isa ka driver sang Bata-Libertad nga jeep matapos ginluthang sa Purok Camansi, Barangay Banago, ciudad sang Bacolod kaina sang aga.
Sa inisyal nga pagpangusisa sang Bombo Radyo Bacolod, positibo nga ginkilala ni Willie Arsenal ang biktima nga amo ang umagad sini nga si Ephraim Payas, legal ang pang-edaron kag tumandok sang ciudad sang Silay apang nagapuyo sa Purok Tinagong Paraiso nagaistar upod sa asawa kag pito ka mga kabataan.
Si Payas ang yara sa lugar bangud may ginpa-welding ini sa vulcanizing shop didto.
Suno kay alias Junjun, ang ginpakay-uhan ni Payas sang ginamaneho sini nga salakyan, kapin 30 minutos pa lamang sini nga ginakay-o ang salakyan sang hinali may nagpundo nga depasahero nga jeep nga duag yellow kag may duha ka sakay – ang driver ang isa pa ka lalaki.
Sang nakita ini sang biktima, nagpudyot ini sang bato kag ginhaboy sa salakyan apang nagpanaog ang driver kag upod sini kag ginlampusan ini sang tubo antes ginluthang sa diin tatlo tubtob apat ka lupok ang nabatian.
Sa impormasyon nga nabaton sang Bombo Radyo, isa ang igu sa ulo kag tatlo sa lawas ang gin-agom ni Payas nga gilayon napatay.
Ginahibalo pa kun sin-o ang mga suspetsado kag subong man ang motibo sa krimen.
