Padayun pa nga ginatumod ang driver sang canter nga aksidente nga nakalapak-patay sa driver sang motorsiklo sa Barangay Aguisan, Himamaylan City.
Ang biktima ang ginkilala nga si Jonathan Macayaran, 48 anyos kag residente sa Barangay Talaban sa nasambitan nga ciudad.
Sa interview sang Bombo Radyo Bacolod kay Police Lt. Col. Anthony Grande, hepe sang Himamaylan City Police Station, si Macayaran ang maga-overtake kuntani sa tricycle nga ginamaneho ni Alrian Mitz Pillone, 27 anyos, residente sang Barangay Palayog, Hinigaran, apang nasagairan sini ang tricycle.
Bangod sini nagwarik ang motorsiklo sa pihak nga lane kun sa diin sugata naman sini ang canter.
Suno kay Grande, ginpahayag sang tricycle driver nga sa una palang nga impact nagtabog na ang helmet sang biktima gani wala gid ini sang pangaman sang matumba kag malapakan sang canter ang iya nga ulo.
Matapos ang insidente, gilayon nga nalagyo ang canter, apang nahimo nga makuha ni Pillone ang plate number sini.
Sa karun ginaverify na sa Land Transportation Office (LTO) kun kay sin-o nakarehistro ang canter.
Panawagan sang hepe sa driver sang canter nga magdangop sa ila talatapan kag atubangon ang pamilya sang biktima.
Nakadepende naman sa pamilya kun sila ang magapasaka sang kaso ukon magapasettle na lamang.
