Sa press conference ni Bacolod City Police Office Director Police Col Joeresty Coronica, 19 tanan ang mga biktima kag pila sa mga ini ang nag-agom lamang sang minor injuries kalakip na ang duha ka mga police samtang 13 pa ang ginabulong sa ospital.
Sa imbestigasyon, maga overtake kuntani ang trisikol sa police patrol kag magabalik na kuntani sa lane sini ang trisikol nabunggauan ini sang nakasugata sini nga salakyan nga ginamaneho ni Jagpret Shingh, 37 anyos, samtang sakay sini ang apat ka iban pa nga Indian nationals.
Apang sabaylo nga magpanaog kag buligan ang mga nabungguan, nagpalayo pa ang suspek kag bangud nga wasak man ang atubang sang kotse naaberiya man ini sa dalan kag sila ang naabutan sang mga kapulisan.
Ang Indian driver ang nag-angkon sang minor injury kag bangud sa mabaskog nga impact naglupok ang airbag sang salakyan.
Ginpaidalom sa alcohol test ang driver kag natumod nga ini ang positibo sa alcohol consumption.
Ginpasiguro man ni Coronica nga indi peke ang drivers license sang suspect apang iba ang tag-iya sang salakyan.
Nakig-angot naman sila sa Bureau of Immigration agud nga matumod ang status sang pagpabilin sang mga Indian national sa pungsod.
Suno kay Coronica bangud nga nagtuyo nga magpalagyo ang suspek sabaylo nga 18 oras ang reglementary period ini ang ginpasaka sa 36 oras kag ginpasiguro nila nga mapasakaan sang kaso nga “reckless imprudence resulting to multiple homicide”, “multiple physical injuries” kag “damage to property.”
Wala man sang indikasyon nga hungod ang pagbunggo sang mga ini mga deboto nga nagprusisyon sang Biyernes Santo.
