Patay ang isa ka drug personality nga yara sa listahan sa notebook sang ginpatay nga si Ricky Serenio matapos ginaalegar magbato sa kapulisan nga nagpatigayon sang buybust operation sa Barangay Vista Alegre, ciudad sang Bacolod, Biyernes sang aga.
Pasado alas-10:00 sang aga sang natigayon ang operasyon sang Regional Drug Enforcement Unit 6 batok sa subject nga si Billy Gelomina alyas Jojo sa Simburyo Landmark, Barangay Vista Alegre.
Sa interview sang Bombo Radyo Bacolod kay RDEU 6 head Police Lt. Thursly Castillo, nagasakay sa motorsiklo si Gelomina sang nakigkita ini sa police poseur buyer sa dalan sa tunga sang kampo sang tubo kun sa diin gindaho niya ang isa ka bulto sang suspected shabu.
Sang naconsummate na ang transaksyon kag hana na siya kuntani nga arestuhon sang response team, namutikan ni Gelomina nga pulis ang iya ginbaligyaan gani naggabot ini sang armas kag gintiro ang poseur buyer.
Bangud sini, napilitan ang pulis nga tiruhon ang subject kag ini ang naigo sa dughan nga nagresulta sa iya kamatayon.
Nakuha sa possession sini ang pila ka sachet sang suspected shabu kag .45 caliber pistol.
Suno diri, ang pangalan ni Gelomina ang nakit-an sa notebook nga narekober sa salakyan ni Ricky Serenio nga napatay matapos gin-ambush sa Barangay Pahanocoy sang Sabado sang hapon.
Ang mga pangalan ang ginforward sa tanan nga drug units sa Western Visayas.
Sang gintsekyar sang RDEU 6, yara man sa ila target list si Gelomina.
Apat pa lamang ka bulan humalin sang nakagwa ini sa prisuhan kag may kaangtanan man sa iligal nga druga ang iya kaso.
Indi residente sang Barangay Vista Alegre diri sa ciudad sang Bacolod si Billy Gelomina nga napatay matapos ginaalegar magbato sa mga miyembro sang Regional Drug Enforcement Unit 6 nga nagpatigayon sang drug buybust operation sa Simburyo Landmark sa amo nga barangay.
Sa interview sang Bombo Radyo kay Punong Barangay Lindy de Leon, ginlili niya ang itsura ni Gelomina kag aminado ini nga indi taga-Vista Alegre ang subject nga napatay.
Nakasugid ang RDEU suno kay de Leon nga tinalikdan pa nga adlaw nagsugod ang ila transaksyon kay Gelomina apang nakalab-ot ini sa Barangay Vista Alegre bangud nagasaylo-saylo sila sang lugar.
Nagdemand man ang subject nga Muslim ang iya dahuan gani nagbayo man ang poseur buyer sang kaangay sang Muslim.
Nagalaom naman ang punong barangay nga magauntat na sa iligal nga buluhaton ang drug pushers sa Vista Alegre bangud masupog ang mga otoridad subong.
Naghingyo man ini sa drug personalities sa iban nga barangay nga ipaiway ang pagtransaksyon sa Barangay Vista Alegre.
