Nakabaton na ang masobra sa 3.7 million nga mga indigent senior citizens nationwide sang ila nga social pension sa una nga anum ka bulan sang tuig 2024.
Ini ang ginpahayag ni Department of Social Welfare and Development (DSWD) Assistant Secretary kag spokesperson Irene Dumlao.
Suno kay Dumlao, ang DSWD ang nakapanagtag sang kabug-usan nga P21.8 billion para sa una nga anum ka bulan sang 2024 sa kabug-usan nga 3,723,323 ka mga indigent senior citizens sa bug-os nga pungsod.
Suno diri, subong nga tuig, ang nasambit nga ahensya sang gobyerno ang nag-umpisa na sa pagpanagtag sang dugang sa social pension nga P1,000 gikan P500.00.
Ang Social Pension (SocPen) ang isa ka programa sa idalom sang Republic Act No. 9994 ukon ang “Expanded Senior Citizens Act of 2010” nga nagahatag sang bulanan nga stipend nga P500 sa indigent senior citizens agud makadugang sa pagbakal sang pang-adlaw-adlaw nga panginahanglanon kag kinahanglanon nga bulong.
Santo sa mandato sang Republic Act 11916 nga kilala man nga “An Act Increasing the Social Pension of Senior Citizens”, nga nangin layi sadtong July 2022, ang mga indigent senior citizens ang magabaton na sang P1000 gikan sa P500 nga nabaton nila kada bulan nga nag-umpisa pa sadtong January 2024.
Ang Social Pension ang ginapanagtag kada semester ukon matapos ang anum ka bulan ang mga beneficiaries ang makabaton sang P6000 ukon P1000 kada bulan.
Dugang pa ni Dumlao, ang mga qualified nga Seniors nga magabaton sang social pension amo ang mga katigulangan nga nagaedad sang 60 pasaka nga mahina, masakiton ukon may yara sang dis-ability kag wala sang bisan ano nga pension nagikan sa iban nga government agencies.
Eligible man nga makabaton sang social pensions ang mga seniors nga wala sang permanente nga ginakuhaan sang income kag financial assistance ukon compensation nga makasuporta sa ila nga basic nga panginahanglanon.
