Nagdangat na sa balor P4.1 million ang narelease nga relief assistance sang Department of Social Welfare and Development (DSWD) Western Visayas.
Sa interview sang Bombo Radyo Bacolod kay DSWD Region 6 spokesperson Atty. May Rago Castillo, wala pa sila nakabatun sang numero sang mga nakabatun sang assistance apang ang narelease nga budget ang nagdangat na sa P4.1 million nga ginabug-usan sang P2.8 million gikan sa DSWD 6 kag ang nabilin ang gikan sa budget sang local government units (LGUs).
Apang paathag ni Castillo nga ini ang initial report pa lamang as of 6:00 pm kahapon kag may mga nagasinulod pa nga report.
Sa pihak nga bahin, 27,093 ka pamilya ukon 117,623 ka indibidwal ang apektado sang Severe Tropical Storm Kristine kag may 72 ka mga balay nga totally damaged kag 664 ka partially damaged.
Ang DSWD ang nagapartner man sa LGUs kun sa diin ang tagsa ka banwa kag ciudad ang nagapadala sa ila sang listahan ukon numero sang mga apektado nga amo ang basihan sa irelease nga relief assistance.
Sa ulihi nga datos, may 1,411 ka pamilya ukon 4,926 ka indibidwal nga yara sa evacuation centers sa bug-os nga Western Visayas.
Panawagan ni Castillo sa mga government officials nga ipaiway anay ang pamulitika kag ipauna ang pagbulig sa mga apektado nga pumuluyo.
Ini sa pihak sang mga kahangawa nga pilion lamang sang mga government officials ang mahatagan sang relief assistance.
Ang DSWD ang may preposition areas, agud mas mahapos sa mga LGUs nga makakuha sang supplies.
Pahanumdom ni Castillo nga nakaseal ang kada boxes sang family food packs nga naga-unod sang bugas, canned goods, kape kag cereals, kag ini ang indi pwede nga irepack.
Paathag sini nga wala na sila nagalakip sang noodles bangod sa manubo nga shelf life.
Ang DSWD Region 6 ang may balor P144.1 million pa nga standby funds nga food packs kag cash.
