Arestado ang duha ka 16 anyos nga lalaki nga nagserbe runner sang illegal nga droga sa drug buybust operation nga ginpatigayon sa Reclamation Area, Purok Lampirong, Barangay 2, Bacolod City.
Ang duha ka menor de edad ang mag-barkada kag lunsay residente sang Purok Serisa South, Barangay 3, Bacolod City.
Ang operasyon ang ginpatigayon sang Bacolod City Police Office – City Drug Enforcement Unit (BCPO-CDEU) sa pagpamuno ni Police Lt. Col. Antonio Benitez Jr.
Sa interview sang Bombo Radyo Bacolod kay Benitez, ang duha ang nakatransaksyon sang ila operatiba, apang nagaserbe lamang nga courier ukon runner sang suspected shabu.
Nakuha sa ila paghinakop ang ginabanta 50 gramos sang suspected shabu nga may standard drug price nga P340,000.
Bangod menor de edad, ang duha ang lunsay ginturn-over sa Social Development Center.
Suno kay Benitez may ginsambit nga pangalan ang duha sang ila ginakuhaan sang suspected shabu apang ini ang ila pa ivalidate.
Panawagan sini sa mga kabataan nga likawan ang mag-intra sa pagbaligya sang illegal nga droga bangod ini ang makaguba sang ila bwas damlag.
