BACOLOD CITY-Padayon pa nga ginapangita ang mga suspetsado nga nagluthang patay sa isa ka persona sa Dos Hermanas St, Brgy. III, San Carlos City.
Mga ala-1:00 sang hapon sang Marso 7 sang ginsulod sang mga suspetsado nga nakasakay sa motorsiklo ang balay sang biktima nga si Mark Roben Dejos, 26-anyos kag ini ang ginluthang.
Suno sa live-in partner sang biktima, nagahigda ini sa sulod sang ila kwarto sang ini ang ginsulod sang duha ka mga suspetsado kag ini ang ginluthang.
Nakaangkun sang pilas sa ulo kag liog ang biktima nga gintunaan sang iya kamatayon.
Suno naman sa panaysayon sang mga testigo, nagasuksok sang ball cap kag naka-mask ang mga suspetsado nga gilayon nagpalagyo sakay sa motorsiklo.
Matapos ang pagpangluthang sa San Carlos City, ginsundan naman ini sa banwa sang La Castellana.
Mga alas-4:30 sang hapon naman sang Marso 7 sang ginluthang man sang mga riding in-tandem suspects ang biktima nga si Rene Sumadhay, 41-anyos sang Sitio Pacita, Brgy. Sag-ang.
Santo sa impormasyon nga nakuha sang Bombo Radyo Bacolod, halin sa sitio proper ang biktima kag pauli na kuntani nga sakay sang traysikol sang hinali lang siya gilabyan sang motorsiklo kag gintiro ini sang backrider.
Nakaangkun sang lima ka igo ang biktima nga gintunaan sang iya kamatayon.
Narekober sa crime scene ang lima ka cartridges sang 9mm caliber.
Santo man sa panaysayon sang mga testigo, nagasuksok sang ball cap kag face mask, kag white t-shirt ang mga suspetsado kag sakay ang mga ini sang duag yellow nga motosiklo.
