Desidido ang pamilya sang 13-anyos nga estudyante sa Bacolod City National High School nga magpasaka sang kaso batok sa 15-anyos sini nga schoolmate nga nagbuno sa iya Huwebes sang hapon.
Bag-o lang natapos ang klase sang nagsunluganay ang grupo sang 13-anyos kag 15-anyos sa sulod sang campus.
Suno sa commander sang Police Station 6 nga si Police Captain Elmer Bonilla, gintawag sang 15-anyos ang 13-anyos nga matalaw.
Sang nakagwa na sa gate, may ginpaypay ang 13-anyos kag gindumdom sang suspetsado nga siya ang ginatawag gani nagluntad ang rambol sa higad sang dalan.
Gamit ang swiss knife, ginbuno sang 15-anyos ang biktima kag ini ang naigo sa nawala nga tiyan, nawala nga kamot kag nawala nga likod.
May nagbuno man sang ice pick sa butkon sang 15-anyos apang wala natumod ang suspetsado.
Suno kay Bonilla, mahimo nga kagrupo man sang 13-anyos ang nagbuno sa menor de edad.
Lunsay naospital ang duha ka estudyante apang nakagwa ang 15-anyos.
