Patay ang duha ka mga menor-de-edad matapos magbunggo ang ila ginasakyan nga motorsiklo sa isa ka truck sang tubo sa KM. 33, Victorias City, Miyerkules sang kaagahon.
Sa interview sang Bombo Radyo kay Police Lt. Col. Eduardo Corpuz, hepe sang Victorias City Police Station, alas 2:00 sang kaagahon sang nagabiyahe sanday Robert Dolorosa, 16 anyos kag Jeffrey Malana, 14 anyos sakay ang isa ka motorsiklo sang ini ang nag-overtake sa ila ginasundan nga salakyan.
Suno kay Corpuz, naglapaw ang motorsiklo sa iya lane kag nasugata sini ang truck nga bag-o lang naghalin sa Victorias Milling Company agud mag-ula sang tubo.
Ini ang ginamaneho ni Virgel Susana, 26 anyos kag residente sang Barangay Catilingban, Talisay City.
Bangud sa kakusog sang impact, nagtabog ang duha ka menor-de-edad kag nagtupa sa dalan.
Nakaangkon ang mga ini sang patal nga pilas ilabi na sa ulo bangud wala sila sang ginasuksok ng helmet.
Ginhingagaw pa sanday Dolorosa kag Malana dala sa balaybululngan apang gindeklarar na nga dead on arrival.
Temporaryo naman nga nakadetain si Susana sa Victorias City Police Station.
