Arestado ang duha ka mga persona nga nagapangawat kag nagapangcarnap sa ciudad sang Bacolod sa operasyon nga ginpatigayon sang Bacolod Police Station 1 sa Corner San Juan-Luzuriaga, Brgy 12, Bacolod City, kahapon, alas 3:20 sang hapon.
Suno kay Police Major Ramil Sarona, station commander sang Bacolod Police Station 1, madugay na nga ginamonitor sang kapulisan sanday Regie Lamprea, 42-anyos, residente sang Barangay Taculing kag Jhay Garcia, 42-anyos, residente sang Purok Lubi, Barangay 3, Bacolod City, bangud madamo sang nabaton nga report ang kapulisan nga imbolbado ang mga ini sa serye sang pagpanghold-up, pagpangmotornap, carnap kag pagpangawat sa ciudad.
Suno kay Sarona, sila ang ginsundan sang mga operatiba kag may lagsanay pa nga natabo sa downtown apang natigayon ang duha nga nadakpan kag nakuhaan sang tatlo ka transparent plastic sachet sang suspected shabu nga nagabug-at sang isa ka gramo kay nagabalor P6,800; lima ka live ammunition sang calibre .45 pistol; isa ka gun replica; isa ka sling bag; isa ka Nmax yamaha version 1 color black yamaha; duha ka improvised tooter; kag isa ka coin purse nga itom.
Kahapon, may pito na nga nagpadulong sa ila estasyon agud magreklamo batok sa mga suspetsado.
Nagapanawagan naman si Sarona sa mga iban pa nga nabiktima sang mga ini nga makig-angot sa kapulisan agud mangin mabug-at ang kaso nga ipasaka sa duha.
Samtang, ginpahayag naman ni Lamprea nga sila ang magasugat sa asawa ni Garcia kag gin-updan man sini ang abyan niya nga magpacheck up bangud ini ang may tuberculosis kag indi na mayo makabati.
Si Garcia kag Lamprea ang mangin mag-abyanay sang sila ang una na nga napriso bangud sa kaso may kaangtanan sa illegal nga druga.
Nag-ako man ang duha nga sila ang nagsuyop pa sa balay ni Garcia.
