Wala sang plano ang Sentrong Samahan ng mga Tsuper at Operators Negros (SSTONE) kag Federation of Bacolod City Drivers Association (FEBACDA) nga magfile ang fare hike petition sa Land Transportation Franchising and Regulatory Board (LTFRB) Region 6.
Sa interview sang Bombo Radyo Bacolod kay SSTONE Chairman Albert Villanueva, ang ila nga focus sa karun amo ang matapos ang proseso sa pagtukod sang kooperatiba, gani wala sa ila mga diskusyon ang pagpasaka sa plete apisar sa pagsaka sang presyo sang gatong.
Nahibaluan nga nagpetisyon na ang pila ka mga national transport group sa Luzon nga pasakaon sa P15 gikan sa P13 ang minimum fare bangod sa asod-asod nga pagsaka sa presyo sang produktong petrolyo.
Paathag ni Villanueva nga ang ginapaligban nila amo nga makapadayun sa pagbyahe matapos ang consolidation deadline sa Abril 30.
Suno diri, okay na ang ila nga kooperatiba, kag sila ang magapasa na lamang sang certificates sang tagsa ka mga miyembro nga magasulod sa kooperatiba.
Paathag sini nga ginpili sang SSTONE kag FEBACDA nga magtukod sang kaugalingon nga kooperatiba bangod madamo sila sang nakita nga problema sa mga existing nga kooperatiba kag korporasyon.
Dugang pa ni Villanueva, nga kun laktan nila sang petisyon sa pagpasaka sang plete mahimo nga mabutang sa alang-alang ang ila proseso sa pagtukod sang kooperatiba.
Paathag sini nga sa Mayo 1, ang mga unconsolidated jeepneys ang indi na makabatun sang provisional authority kag indi na makabyahe sa Mayo 1, gani wala sang pulos kun magpasaka sang plete kun wala man nakasulod sa first stage sang public utility vehicle modernization program.
Ang maximum nga unit nga ila mapasulod sa kooperatiba ang yara sa 1,200 tubtob 1,500 units, samtang sila ang makabyahe pa sang mahimo tatlo tubtob apat ka tuig.
Sila ang mahimo naman nga makabyahe bisan diin gikan sa 42 ka mga routa nga available sa ciudad sang Bacolod.
