Patay ang duha ka tuig nga bata nga babayi matapos malumos sa balde sa San Francisco Village, Barangay Nabulao, Sipalay City kahapon sang aga.
Suno kay P/Staff Sgt Cyril Bañaco [Baniaco], imbestigador sang Sipalay City Police Station, ang amay lamang sang biktima kag manghod sini nga duha ka bulan ang iya nga kaupod sa balay sang natabo ang insidente.
Samtang ang iloy nila ang nagpadulong naman sa Sipalay City Proper agud magbaligya sang prutas.
Magkaupod sa gwa sang balay ang duha ka tuig nga biktima kag ang iya nga amay sang hinali nalang nga naghibi ang duha ka bulan nga lapsag sa sulod sang balay.
Gani nagsulod ang amay agud nga ini ang patition apang paggwa sini, iya na lamang nasapwan ang biktima nga nakasulod na sa dako nga balde ang katunga sang lawas sang bata kag wala na nagahulag.
Ginalantaw sang mga kapulisan nga mahimo nagtaklas ang bata kag wala na sini nasarangan pa nga ibalik ang iya nga lawas gani ini ang nalumos.
Ginhingagaw pa ini dala sa Sipalay City Health Office apang gindeklarar na nga dead on arrival.
Pahayag ni Baniaco nga tuman ang kalisod sang ginikanan apang wala man sang mga ini gingusto nga matabo ang disgrasya.
Dako man ang paghinulsol sang ginikanan kag nagapinsar nga kuntani mas nabantayan sang maayo ang ila lamharon nga bata.
