Pilason ang duha matapos maglab-anay ang tatlo ka magpakaisa sa Barangay Mansablay, Isabela, Negros Occidental.
Sa interview sang Bombo Radyo Bacolod kay Police Lt. Ildefonso Leonardo Jr. Deputy Chief sang Isabela Municipal Police Station, magka-upod nga naga-inom sang makahulubog nga ilimnon ang magpakaisa nga sanday Alyas Abel, 34 anyos, Alyas Benito, 40 anyos, kag Alyas Joan, 36 anyos, lunsay single kag laborer.
Interview sang Bombo Radyo Bacolod kay Police Lt. Ildefonso Leonardo Jr. Deputy Chief sang Isabela Municipal Police Station
Suno diri, naglalisay ang tatlo bangod lamang sa indi paghangpanay sa estorya hinubog.
Tubtob nga hinali nga ginlabo ni Benito si Abel, nga nakaangkon sang samad sa ulo.
Matapos sini, gamit ang binangon, ginbalusan man ni Joan sang labo si Benito nga napilasan sa natuo nga abaga.
Si Abel ang sa karun padayun pa nga ginabulong sa ospital samtang si Joan kag Benito ang lunsay temporaryo nga gindetain sa Isabela Municipal Police Station.
May inisyal na nga pag-inistoryahanay sa tatlo, kag kaangay nga wala na sang may magapasaka sang kaso bangod sila ang magpakaisa lang man kag ini ang tuga lamang sang hinubog nga estoryahanay.
