Ginpalawig man tubtub sa katapusan sang subong nga bulan ang enhanced community quarantine sa Bacolod bangud sa coronavirus disease.
Nahibaluan nga una na nag-extend sang ECQ ang Negros Occidental paagi sa ginpapanaog nga Executive Order No. 20-20-A Series of 2020 ni Governor Eugenio Jose “Bong” Lacson nga nagamando sang extension sang ECQ tubtob sa Abril 30.
Sa press conference nga ginpatigayon ni Bacolod City Mayor Evelio “Bing” Leonardia kahapon sang hapon, ginpahayag sini nga ginamando niya ang pagpalawig sang ECQ sa ciudad halin sa alas-11:59 sang gab-i sa Abril 14 tubtob sa alas-11:59 sang gab-i sa Abril 30 agud malimitahan ang transmission sang COVID 19 paagi sa Executive Order No. 29 series of 2020 nga iya gin-issue.
Suno kay Leonardia, ang nasambit nga tikang ang iya nadesisyunan matapos siya magkonsulta kay Vice Mayor El Cid Familiaran nga chairman sang Inter-Agency Task Force against coronavirus subong man sa City Health Office, Disaster Risk Reduction and Management Office kag sa iban pa nga mga sektor.
Dugang pa sini nga ang statistics sang COVID-19 sa Bacolod ang nagapakita nga padayon pa ang balatian sa ciudad.
Suno sa iya, may yara pa sang 56 ka mga pending results nga ila nahulat nagikan sa mga bio laboratories sa Manila kag Iloilo.
Nahibaluan nga kabug-usan nga 162 ka mga indibidwal ang ila nga gintest tubtob kahapon.
Pito diri ang nagpositibo kun sa diin isa ang napatay samtang 99 naman ang nag-negatibo.
Suno sa alkalde, kinahanglan nga hulaton anay nga maggwa ang resulta sang mga nabilin antes batakon ang ECQ sa ciudad.
Kadungan sini, extended man ang validity sang tanan nga ECQ pass nga gin-issue sang ciudad tubtub alas-11:59 sang gab-i sa Abril 30.
Nagapabilin man ang effectivity sang EO nga nagamandu sang paggamit sang face mask kun magkadto sa pampubliko nga mga lugar.
