BACOLOD CITY – Iga-patawag na sa masunod nga semana sang punong barangay kag konseho sang Brgy. 12-A, Talisay City si Brgy. Kagawad Edwin de Pedro.
Ini ang kasunod sang pag-hingalan ni Ricky Serenio ang bagman sang drug lord nga si Victoria alyas Beria Tolentino kay Kagawad de Pedro nga nalakip sa payola sang naga baton sang drug money.
Ini ang tikang ni Punong Barangay Eduardo Oñas kag sang konseho sang barangay agud mag eksplekar si De Pedro sang gina-alegar ni Serenio nga kahilabtanan sini sa iligal nga droga.
Suno kay Oñas nakibot ini kag ang mga pumuluyo sang Brgy. 12-A sang ila nabatian sa radyo ang balita tuhoy kay De Pedro.
Nakigkita na si Punong Barangay Oñas sa Dept. of Interior and Local Government (DILG) Talisay apang maga pangonseho anay sa kapulisan ang mga ini tuhoy sa kaso ni De Pedro.
Nahibaluan nga wala na ini nagtambong sa sesyon tinalikdan nga mierkoles bangud naghingyo ini nga hatagan sang ligwa agud atubangon ang mga alegasyon batok sa iya.
Samtang, gin pahayag ni Oñas nga bilang punong barangay naga-kabalaka man ini sa kahimtangan sang isa sa iya mga kagawad.
Si De Pedro, upod kay Joe Liboon, ang gin tumod ni Serenio nga mga taga-media nga nagabaton sang payola gikan kay alyas Beria.
