Ang isa tawo kun nagutom nagapangita sang pagkaon kag ini man ang ginahimo sang mga sapat kaangay lamang sang isa ka gutom nga elepante nga halin sa kakahoyan ang nagtuga sang kakugmat sa isa ka grocery store sa Thailand matapos ini naglakat halin sa malapit nga national park kag nangawat sang pagkaon gikan sa mga food shelves.
Makita nga ang lalaki nga elepante nga kilala sa ngalan nga Plai Biang Lek, ang nagtindog anay sa gwa sang tindahan nga nahamtang sa kilid sang dalan malapit sa Khao Yai National Park sa northeastern Thailand, antes niya ginduso ang iya bug-os nga lawas agud makasulod sa tindahan.
Nag-untat ang elepante sa atubang sang counter, kalma lang nga nagkuha kag nagkaon sang mga snacks, kag wala gid sang nagpakita sang kahadlok bisan ginapanikasog sang mga trabahador sang national park nga pagwaon ini.
Pagkatapos, nag-atras siya pa-gwa halin sa tindahan samtang nagadala sang isa ka bag sang snacks gamit ang iya ilong.
Wala naman ini nagbilin sang dako nga kahalitan, magluwas sa lutak nga tinapak sa salog kag marka sa kisame.
Suno sa tag-iya sang tindahan, nakakaon ang elepante sang siyam ka bags sang sweet rice crackers, isa ka sandwich, kag pila ka dried bananas.
Wala naman ini ginkadismaya sang tag-iya, kon sa diin, nagkadlaw pa matapos ang hitabo.
