Indi na bag-o sa atun nga sa isa ka trabaho may-ara sang natalana nga maternity leave para sa nagabusong ukon nagbata nga empleyado, apang mahimo mo bala nga magpakuno-kuno nga nagabusong agud makabatun sang kaangay nga benipisyo?.
Isa ka babayi sa pungsod Georgia ang gina-alegar nga makapila na ka beses nga nagpakuno-kuno nga nagabusong agud nga makuha ang benepisyo gikan sa maternity leave, apang nabuking ini sang iya nga mga katrabaho matapos nga mapalos sa iya nga tiyan ang peke nga baby bump.
Sang Oktobre 2020, si Robin Folsom, nga nagatrabaho bilang Director of External Affairs sa Georgia Vocational Rehabilitation Agency, ang nagpahayag sa iya nga mga boss nga siya ang naga-ekspektar sang baby gani siya ang nagschedule sang maternity leave.
Si Folsom ang may-ara sang tuigan nga sweldo nga nagadangat sa 100,000 dollars ukon masobra P5.1 million samtang siya ang entitled naman sa 15,000 dollars ukon masobra P750,000 nga paid leave.
Apang sa tion sang iya nga gina-alegar pagbusongm isa sa iya nga co-worker ang nakatalupangon sang madagdag ang baby bump gikan sa tiyan sini, gani nagpati ang mga empleyado nga peke lang ang pagbusong ni Folsom.
Dugang pa nga ginkatingala sang gina-alegar nagbata si Folsom, kag kadungan sa pagsulod sang paid leave ini ang nag-umpisa man sa pagsend sang mga litrato sang iya nga bag-ong bun-ag nga baby.
Apang santo sa opisina sang inspector general, ang mga litrato sang baby nga ginsend sini ang may lainlain nga skin tone.
Gin-akusaran man ang 43 anyos nga si Folsom sa paghimo-himo lang sang tatay sang iya nga himo-himo man nga baby, nga ginpakilala sini nga si Bran Otmembebwe, nga naga-email man sa iya anay mga boss kag naga-impormar nga gina-abisuhan ini sang doktor nga magpabilin anay sa balay sa sulod sang pila ka semana para sa bed rest kasunod sang pagbata.
Ang mga red flags ang nagdangat naman sa imbestigasyon kun sa diin napamatud-an nga wala sang official records nga si Folsom ang nagbata.
Dugang pa nga wala man makita sa medical insurance records sini nga siya ang nagpaidalum sa prenatal exams ukon delivery.
Ini ang nangin makatilingala ilabi na nga ginreport sini nga siya ang liwat nga nagbata sang Hulyo 2020 kag liwat nga nagbusong sang Agosto 2021.
Si Folsom ang nagresign sa iya nga trabaho sang Oktobre 2021, matapos nga gin-interview sang state investigators nahanungod sa iya nga mga pagbusong kag request para sa paid leave.
Sa tion nga maconvict si Robin Folsom, siya ang magapangatubang sang 10 ka tuig nga pagkapriso bangod sa identity fraud kag tubtob lima ka tuig nga pagkapriso sa kada kaso bangod sa false statements kag ini ang may risgo man nga mamalayran sang 103,000 dollars ukon kapin P5.3 million nga multa kun siya ang mapamatud-an nga guilty.
