Nagpositibo sa coronavirus disease ang isa ka empleyado sang gobyerno sa probinsya sang Negros Oriental.
Sa interview kagab-i sang Bombo Radyo Bacolod kay Bimbo Miraflor, public information officer (PIO) sang Negros Oriental, ginpahayag sini nga positibo ang resulta sang test nga ginpatigayon sang Research Institute for Tropical Medicine ukon RITM.
Ang pasyente ang isa ka 62 anyos nga lalaki, isa ka government official kag residente sang isa ka banwa sa Negros Oriental.
Antes pa ini magmasakit, nagpadulong ini sa Metro Manila agud mag-attend sang pamulong-pulong kag antes nagpauli, nagbisita ini sa Greenhills Shopping Center, ang mall sa diin nahamtang ang prayer hall nga masami ginabisitahan sang isa ka persona nga may yara sang COVID-19.
Makaligad ang lima ka adlaw nga nakapauli ini, nagmasakit ang biktima.
Sa karun, nakaadmit ang biktima sa Siliman University Medical Center agud madapatan sang nagakaigo nga pagbulong samtang nakahome quarantine naman ang tatlo ka iban pa nga kaupod sang biktima bangud nagpakita ini sang mild symptoms.
Ini na ang ikatatlo nga kaso sang COVID-19 sa Negros Oriental.
Madumduman nga isa sa duha ka una nga nagpositibo ang mag-asawa nga Chinese National kag nagikan sa Wuhan City sa China.
