Nagapasalamat naman ang mga opisyal sa ciudad sang Bacolod kag probinsya sang Negros Occidental sa energization sang Cebu-Negros-Panay Backbone Project Stage 3 kaina sang aga, nga gintambungan mismo ni President Ferdinand “Bongbong” Marcos Jr.
Sa interview sang Bombo Radyo Bacolod kay Bacolod City Mayor Alfredo “Albee” Benitez, ini ang maayo nga balita bangod makasulod na ang dugang nga supply gikan sa lain nga sources bangod may-ara na sang nagakaigo nga transmission lines.
Ang CNP 230-kilovolt ang ginabug-usan sang tatlo ka stages sa CNP1, CNP2 kag CNP3 kalakip na ang Negros-Panay Interconnection Line 2 nga may tinutuyo nga ma-imprubar ang reliability sang transmission services sa area kag masuportahan ang pagsulod sang renewable energy sources sa grid.
Ini ang ginalakipan sang 670 transmission towers nga may kalabaon nga 442 circuit kilometers nga transmission lines.
Suno kay Benitez, nagasaka ang demand sang kuryente sa rehiyon gani kinahanglan man ang dugang nga supply.
Ginalauman naman nga maganubo na ang systems loss bangod mas madasig na ang transmission sa 230 kilovolt.
Aminado naman ang alkalde nga makabulig ang transmission line sa pagsulod sang dako nga supply apang indi man maseguro nga wala na sang matabo pa nga brownout bangod may mga factors sa distribusyon kag generation component.
