Magasugod na sa Miyerkules Hulyo 3 ang enrollment period sang Department of Education (DepEd) para sa School Year 2024-2025, kag magatakop Hulyo 26.
Sa interview sang Bombo Radyo Bacolod kay Hernani Escullar Jr., public information officer sang DepEd Region 6, may tatlo ka paagi sa pag-enroll nga ginalakipan sang in-person ukon face to face, remote ukon paagi sa SMS, text message ukon sa email, kag pinaagi sa drop box nga ihamtang sa gwa sang mga eskwelahan kag Barangay Hall.
Paathag sini nga information slip lamang ang kinahanglan sa enrollment magluwas sa mga Kinder Garten, Grade 1, Grade 7, Grade 11 kag transferees nga magakinahanglan sang basic enrollment form.
Pahanumdom ni Escullar nga indi mahimo nga requirement ang payment collection sa enrollment, sa baylo ini ang sarang mahimo sa pagpadayun na sang klase.
Suguran naman ang implementasyon sang National Learning Camp.
Bilang preparasyon sa opening sang klase, ang Brigada Eskwela ang suguran sa Hulyo 22 tubtob 27, agud maplastar ang mga eskwelahan antes ang pagbukas sang klase sa Hulyo 29.
Ginapahanugutan naman ang buluthuan nga makabatun sang donations gikan sa mga stakeholders, apang ini ang dapat voluntary.
Apang sa karun sila ang nagahulat pa sang official guidelines gikan sa DepEd National Office sa ipagwa nga official DepEd calendar.
