Gilayon nga nagpagwa sang Executive Order No. 57 series of 2020 si Bacolod City Mayor Evelio “Bing” Leonardia nga nagamando sa pagbutang sa ciudad sa idalom sang General Community Quarantine (GCQ) sugod subong nga adlaw, Setyembre 1 tubtob Setyembre 30 kasunod sang rekomendasyon sang national inter-agency task force.
Nakasaad sa amo nga EO nga may yara sang pagagamiton nga home quarantine pass sugod Setyembre 3 tubtob 15 kag mapahamtang sang check-up points kag hugot nga ginamando ang istrikto nga home quarantine.
Ginamando man ang limited public transportation sa ciudad.
Sa mga jeep kag bus, ang pasahero ang dapat magpungko sang 2 passengers apart; sa mga taxi dapat duha lang ka pasahero sa likod kag wala sang pasahero sa atubangan samtang sa tricycle naman, duha ka pasahero ang ginatugutan nga makasakay kun sa diin isa sa atubangan kag isa sa likod.
Padayon naman nga mangin fully operational ang mga talatapan sang city government nga nagahatag sang essential government services samtang ang iban naman nga mga departamento kag opisina ang maga-obserbar sang work-from-home scheme.
Pwede maka-operate ang mga negosyo nga yara sa idalom sang Category I, II kag III sa idalom sang DTI Memorandum Circular No. 20-44.
Ginatugutan man sa idalom sang GCQ ang dine-in services basta 50% lamang sang kapasidad sang restaurant ukon fast food.
Pagasiraduhan sa gihapon ang Central Market, Burgos Market kag Libertad Market kada Domingo para sa disinfection.
Bukas man ang mga mall kag commercial centers kun sa diin maka-operate lang ini sang 50% sang ila capacity apang closed naman ang mga leisure establishments.
Gina-engganyo man nga mag-operate ang mga negosyo nga nagahatag sang essential goods and services kaangay sang mga supermarkets, grocery stores, public kag private markets kag botika tubtob 12 oras.
Ginadumilian gihapon ang mass gatherings sa idalom sang GCQ apang ang religious gatherings ang pwede tubtob sa 10 ka tawo.
Samtang, ang curfew naman sa ciudad ang magasugod alas-10:00 sa gab-i tubtob alas-4:00 sang kaagahon umpisa subong nga adlaw tubtob Setyembre 15 lamang.
Partially lifted naman ang liquor ban nga ginapatuman sa ciudad.
Pwede makabakal sang makahulubog nga ilimnon sugod alas-12:00 sa udto tubtob alas-6:00 sa gab-i.
Ginatugutan naman ang pag-inom sa mga private residences lamang.
Liwat naman nga mapahamtang sang check-up points sa ciudad kag sa mga borders sini sugod Setyembre 3 tubtob 15.
Pananglitan nga may yara sang magpositibo sa COVID-19 sa isa ka barangay ukon cluster sang barangay, sarang nga magpatuman sang localized lockdowns.
Samtang kahapon, ginpirmahan man ni Governor Lacson ang Executive Order 20-43 series of 2020 nga naga-extend sang modified general community quarantine (MGCQ) status sa Negros Occidental epektibo subong nga adlaw tubtob Setyembre 15.
Magapabilin ang mga protocols kag pagsulundan apang sa section 2 sang EO, suspendido ang tanan nga domestic flights kag sea travel padulong sa probinsya halin Setyembre 1 tubtob Setyembre 7.
