Ipasaka na ano man nga oras subong nga adlaw ang kaso nga murder batok sa tatlo ka mga suspetsado sa pagtiro-patay sa anay kagawad nga si Fernando Toreno sa Crossing Brgy. Kumaliskis banwa sang Don Salvador Benedicto kahapon sang aga.
Sa interview sang Bombo Radyo Bacolod kay P/Capt. Gerald Muya, nadakpan ang duha ka mga suspetsado sa ciudad sang San Carlos samtang ang isa naman sa banwa sang Don Salvador Benedicto sa ginpatigayon nga checkpoint operation.
Suno kay Muya, ang mga suspetsado amo sanday Armando Larida, George Larida kag Junniver Nuñez nga lunsay mga residente sang Purok Humayan, Barangay Bagong Silang, Don Salvador Benedicto.
Daan nga hiligut-anon ang ginatulok nga motibo sa pagpamatay kay Toreno.
Santo sa inisyal nga imbestigasyon sang kapulisan, nagtimalos ang mga suspetsado bangud isa sa mga ini ang gin-ambush man sang una sang biktima.
Nakaangkon sang tatlo ka igo sang bala sa ulo si Toreno nga gintunaan sang kamatayon sini.
Narekober naman sa crime scene ang lima ka mga empty cartridge sang caliber .45 pistol.
Sa karon suno kay Muya, nakahunong ang duha ka mga suspetsado sa San Carlos City Police Station samtang ang isa naman ang yara sa paghinakop sang DSB PNP.
