Duha ka mga kandidato sa mayoral race sa Silay City, nag-atubangay sa Debate sa Bombo.
Lantaran nga ginprangka ni former Silay City mayor Jose ‘Oti’ Montelibano nga ‘plastic’ ang iya kasumpong sa pagka-alkalde nga si incumbent Silay City Mayor Mark Golez.
Ini ang kinaiya ni Golez para kay Montelibano nga kun siya ang botante, indi niya pagbotohon bilang alkalde.
Suno kay Montelibano, indi makapalapit kay Golez ang mga pumuluyo sang Silay bisan may yara sila sang importante nga kinahanglanon bangud indi makasaka sa Office of the City Mayor.
Kun makasaka man sa opisina suno sa anay alkalde, tinted ang talatapan ni Golez kag masami nagatupad sang abugado sa tion nga may Silaynon nga may kinahanglan.
Pabugal ni Montelibano, 18, 000 ang yara sa iya phonebook bangud sang siya ang nagapungko nga alkalde, direkta nga nagatext ang mga pumuluyo sa iya.
Samtang, ginpanindugan naman ni Golez nga indi siya plastic.
Suno kay Golez, wala siya kuntani ginkuha ni Montelibano nga bise alkalde sadto kun siya ang plastic.
Nagapati ini nga suli ang panan-awan ni Montelibano sa iya pamatasan bangud siya mismo ang nagapalapit sa mga tawo.
Nahibaluan nga bise alkalde ni Montelibano si Golez antes ang 2016 elections kun sa diin natapos ang termino sang anay opisyal kag nagpapili ang iya misis.
