BACOLOD CITY — Makaligad ang pila ka semana nga paghipos, nagpagwa na gid man sang statement ang anay administrator sang Sugar Regulatory Administration ukon SRA may kaangtanan sa iya pagbiya sa pwesto.
Sa press conference nga ginpatawag ni Atty. Anna Rosario Paner sa ciudad sang Bacolod kahapon, gin-athag sini nga wala siya ginpahalin ni Presidente Rodrigo Duterte kundi siya ang nagresign.
Madumduman nga ginpahayag ni Duterte nga gin-fire sini si Paner bangud sa ginapahayag korapsyon sa SRA.
Apang suno kay Paner, nagtender siya sang resignation sang bulan pa sang Agusto apang sang Lunes lang ini ginbaton ni Duterte.
Paathag sang abugada, ginpili niya nga maghipos tubtub nga opisyal nga ginbaton sang presidente ang iya resignation bilang pagrespeto sa chief executive.
Subong nga wala na si Paner sa SRA, nagpasalamat ini gihapon kay Duterte sa trust and confidence nga ginhatag sa iya sang ginbutang ini sa pwesto sang nagligad nga tuig.
Suno diri, natuman ang iya handom nga magserbisyo sa mga Pilipino bangud sa iya pagpamuno sa ahensya.
Nagpasalamat man ini sa tanan nga mga empleyado sang SRA nga nangin kaupod niya sa trabaho.
