Nagpanindugan ang negosyante nga gina-alegar nga nagbuya sang shooting threat sa Negros Occidental Provincial Capitol nga siya ang wala nagpamahog.
Sa exclusive interview sang Bombo Radyo Bacolod John Sy Keng Seng, kapin duha ka oras siya nga naghulat sa kapitolyo probinsyal agud nga kuhaon ang dokumento halin kay Negros Occidental Provincial Administrator Atty. Rayfrando Diaz.
Suno kay Keng Seng madugay na nga ginaestoryahan sang provincial government ang Bulk Water Project, apang kaangay nga wala na sang update.
Ginreklamo man sini ang mga guba nga telepono sang Provincial Capitol nga indi matawgan.
Suno diri, nagtanyag pa siya nga buligan ang kapitolyo nga matakdan sang linya sang telepono.
Panindugan ni Keng Seng nga indi niya buluhaton ang pagpamahog kag indi siya abusador.
Suno diri, ginhingyo sini sa isa ka empleyado nga kuhaon na niya ang nasambit dokumento kag kun mamwersa si Atty Diaz ipatiro niya ini sa gwardiya mismo sang kapitolyo.
Dugang pa sini nga may yara sila sang witness sa natabo kag nakakuha man sila sang video.
Suno kay Keng Seng, kun pasakaan siya sang kaso sang provincial government handa siya nga atubangon ini.
Samtang mensahe niya nga magpreparar man ang indibidwal nga nangin rason kag nagpagwa sang report nga siya ang namahog apisar nga wala sang kamatuoran.
Ini bangud mahimo siya magpasaka sang kaso batok diri kag mismo sa provincial government.
Panawagan sini sa provincial government nga indi mag-fabricate sang estorya kag kun ano lamang ang matuod nga natabo, amo lamang ang ipagwa.
