Ginpangunahan ni Negros Occidental Governor Eugenio Jose “Bong” Lacson ang pagbukas sang 30th Panaad sa Negros Festival kahapon, Abril 13, 2026.
Sa mensahe sang gobernador, ang selebrasyon sang 30th Panaad sa Negros Festival ang tion nga liwat matipon ang tanan nga Negrense.
Suno kay Lacson, ang selebrasyon ang pagpakita sang identity sang mga Negrense kasubong man ang mga estorya sang nagligad, mga kadalag-an, kabudlayan kag shared aspirations.
Ini man ang tion nga nagtipon ang 32 ka mga banwa kag ciudad sa probinsya agud nga ipakita nga nagaisa ang Negros Occidental.
Dugang pa sini nga Negros Occidental ang mabakod nga nagatindog kag nagaisa sa pag-atubang sang mga kabudlayan.
Suno pa sa gobernador ang 30th Panaad sa Negros Festival ang tion man agud nga ipakita kun ano ang Best sang Negros Occidental.
Ginpasalamatan man sini si Negros Occidental Vice Governor Jose Benito Alonso sa bulig kag miyembro sang Sangguniang Panlalawigan, mga alkalde sang banwa kag ciudad kag tanan nga stakeholders sa wala untat nga pagsuporta agud nga matigayon ang kapiyestahan.
Naghatag man sang mensahe si Negros Occidental Provincial Administrator Atty. Rayfrando Diaz sa pagbukas sang 30th Panaad sa Negros Festival.
Sa mensahe ni Diaz, apisar sang mga pagpanghangkat nga ginapangatubang ginpakita sang tagsa ka Local Government Units ang pagtinguha agud nga maplastar ang tagsa ka mga pavillion.
Suno pa diri nga madamo man ang nagpakigbahin sa mga events.
Suno kay Diaz, makita man sini ang intensity sa mga performance nga nagakahulugan lamang nga palangga sang mga Negrense ang Panaad sa Negros Festival.
Nagapati man ini nga ang spirit sang mga Negrense ang mas mabakod sangsa mga ginapatubang nga krisis.
Ginpahayag man sini nga ang provincial government sa pagpanguna ni Negros Occidental Governor Eugenio Jose “Bong” Lacson, Negros Occidental Vice Governor Jose Benito Alonso, Department heads kag iban pa ang nagpreparar sa selebrasyon agud nga ipakita ang talento, kultura, kasaysayan kag tradition sang mga Negrosanon.
Naghatag man sang mensahe ang executive director sang Panaad sa Negros Festival 2026.
Sa mensahe ni Charina Magallanes-Tan, ang pagtinguha sang tanan agud nga matigayon ang selebrasyon sang nasambit nga kapiyestahan ang nagapakita lamang sang pagpalangga sa probinsya sang Negros Occidental.
Suno kay Tan, ang 30 ka tuig nga pagtipon sang mga Negrense ang nagapahanumdom lamang sang shared commitment sa kada isa.
Gin-agda sini ang tanan nga mga bisita nga mag-enjoy bangud madamo sang mga aktibidad nga mahimo sang mga ini nga i-enjoy sa ila pagbisita agud mangin kabahin sang selebrasyon.
