Padayon pa sa karun ang imbestigasyon sang Philippine Coast Guard – Negros Occidental matapos naaberiya ang isa ka fastcraft sa tunga lawod.
Sa interview sang Bombo Radyo Bacolod kay Judy Fabular, isa sa mga pasahero sang supercat nga St. Emmanuel, pasado ala-1:00 subong gid lang nga hapon natabo ang insidente.
Ginsaysay sini nga 30 minutos ang nakaligad sang sila ang nakahalin sa bredco port sang ila napanimahuan nga may aso sa sulod sang nasambit nga fastcraft, kag didto na napatay ang makina.
Nag-dangat sa duha ka oras ang pag-utaw-utaw sang supercat antes pa man nag-abot ang tugboat nga gin-padala sang coast guard.
Samtang, gin-athag naman sang commander sang PCG-Negros kun ngaa wala gilayon nakaabot ang rescuer sa baybayon.
Suno kay Lt. Commander Luduvico Librilla, slow moving ang tugboat rason nadugayan ang mga ini antes makaabot sa area.
Ginpahayag man sini nga wala man ni gin-pabay-an ang ila obligasyon. Wala naman sang casualties nga na rekord ang talatapan bangud sa natabo.
Mahibaluan nga gikan sa syudad sang Bacolod ang supercat nga st. emmanuel kag padulong kuntani sa syudad sang Iloilo.
Date of airing: April 10, 2019
