Isa na naman ka bronze ang nadugang sa medalya nga mapauli sang Pilipinas sa 2024 Paris Olympics pinaagi kay Filipina boxer Nesthy Petecio.
Ini apisar sa 4-1 split decision kun sa diin nalutos ang boksidor batok kay Polish boxer Julia Szeremeta sa semifinals sang women’s 57kg division sa Roland-Garros Stadium.
Ang pagkalutos ang nagakahulugan nga si Petecio ang magapauli sang bronze medal, nga amo ang ika-apat nga medalya sang Pilipinas kasunod sang double-gold medal ni Carlos Yulo sa men’s artistic gymnastics kag bronze medal ni Filipina boxer Aira Villegas sa women’s 50kg division.
Sa umpisa, si Petecio ang ginalantaw nga maka-abanse sa paghampang para sa gold medal bangod sa performance sini sa una nga round, apang ini nahimo nga makabawi sang 20 anyos nga Polish boxer sa second kag third rounds.
Nangin dikit naman ang hampang bangod sa first round, si Petecio ang daog sa lima tanan ka scorecards, samtang sa second round si Szeremeta ang nakakuha naman sang apat gikan sa lima ka scorecards.
Sa third round, nangin masako ang pagbuya sang inumol sang Polish boxer, gani apisar nga nagbuya man sang madamo nga inumol si Petecio, ini ang ginkulabos kag wala nakakumbinser sa mga judges nga lunsar nagpabor sa iya kasumpong.
Si Szeremeta ang sunod nga maga-atubang sa top seed nga si Lin Yu Ting sang Chinese Taipei para sa gold medal match.
Si Lin ang nagdaog naman batok kay Turkish boxer Esra Yıldız Kahraman sa score nga 5-0.
Kaangay kay Imane Khelif sang Algeria, si Lin ang isa man sa boksidor nga may gender controversy sa Paris Olympics.
Ini bangod ang Chinese boxer ang nadisqualify naman sa world championships sang 2023 bangod wala makapasar sa gender eligibility tests.
