Palaligban sa karun sang Democrats kun sin-o ang ila igabulos bilang nominee sa pagka-Presidente sa US Presidential Elections matapos ang pagwithdraw ni President Joe Biden.
Kaina sang kaagahon, gin-anunsyar ni Biden paagi sa isa ka statement nga ginpagwa sini sa social media platform nga X, nga apisar nga intensyon sini nga liwat nga magpapili, nagapati ini nga mas maayo para sa iya partido kag pungsod nga magpaiway kag magfocus na lamang sa pagfulfill sang iya duties bilang Presidente sa nabilin sini nga termino.
Suno diri, siya ang magapatigayon sang address subong nga semana natuhoy sa dugang nga detalye sang iya desisyon.
Si Vice President Kamala Harris ang iya gin-endorso nga mangin nominee tal-os sa iya.
Suno kay Bombo International News Correspondent Noor Morana direkta sa Houston, Texas, nagaginamo sa karun ang mga Democrats kag ginapaligban kun paano matapos ang succession sang presumptive nominee bangud indi buot-silingon nga gin-endorso ni Biden si Harris, ini na ang magabulos sa iya kundi magaagi pa ini sa proseso paagi sa convention.
Suno diri, luyag sang mga Democratic senators ang mga gobernador nagikan sa wing states kaangay sang North Carolina kag Michigan.
Ginalantaw naman sini nga pabor sa bahin sang Republican ang natabo nga pagwithdraw ni Biden.
