Isa pa lamang ka stall ang nagbukas sa pagbaligya sang firecrackers kag fireworks sa likod sang Pope John Paul II tower sa Bacolod City.
Sa interview sang Bombo Radyo kay Ryan Villaruz, board member sang Bacolod City Firecrackers and Fireworks Association, padayon ang pag-install sang mga vendors sang ila mga stall kun sa diin isa pa lang ang nagbukas sa pagbaligya kag nakaplastar na samtang ang iban naman nagdesisyon nga sa Disyembre 20 na lang mag-umpisa sa pagbaligya.
Suno diri, iban mas ginpili nga ulihi na lang magbukas bangod ginalauman ang pagduging sang mga manugbakal sa Disyembre 29, 30, kag 31.
Suno kay Villaruz, ang presyohanay sa karun ang kaangay man sang tinalikdan nga tuig apang may yara man sang iban nga nagpanubo sang presyo.
Pahayag sini, strikto sila sa pagsunod sa kun ano lang ang mahimo nga mabaligya kag hugot nila nnga ginabawal nga magbaligya sa mga menor de edad samtang, gina-edukar man nila ang mga manugbakal kun paano ginagamit ang palupok.
