Nagpadulong kahapon sa Bacolod City Government Center ang mga mananagat kag mangunguma nga wala nakabaton sang assistance sa idalom sang Presidential Assistance to Farmers, Fisherfolk, and Families (PAFF) nga programa ni Presidente Ferdinand ‘Bongbong’ Marcos Jr.
Madumduman nga sang nakaligad nga Huwebes, June 27, nagpadulong ang presidente sa ciudad sang Bacolod para maghatag sang ayuda sa mga mananagat kag mangunguma, sa programa nga ginpatigayon sa UNO-R.
Apang, pila ka mga pumuluyo ang wala mahatagan kag nagreklamo.
Kahapon, sila ang nagpadulong kay Bacolod City Mayor Alfredo ‘Albee’ Benitez bitbit ang ila mga dokumento nga sila ang kwalipikado.
Suno kay Benitez, may ginhatag nga P10 million ang presidente para sa ciudad, nga amo ang ginalantaw nga pagakuhaan sang ihatag sa mga kwalipikado nga benepisyaryo nga wala nakabaton sang ayuda.
Suno diri, iga-verfiy sini kun ang mga nagpalapit nga mga mananagat kag mangunguma ang matuod nga miyembro sang asosasyon.
Samtang, plano man sa karon sang ciudad nga mag-issue sang IDs para sa mga mananagat kag mangunguma nga miyembro sang mga asosasyon agud nga mas mahapos sila nga makilala.
