BACOLOD CITY — Ginapaabot nga magasaka sa masunod nga binulan ang numero sang mga foreign nationals nga maga-apply sang Special Study Permit agud nga makaeskwela sa ciudad sang Bacolod.
Sa datos sang Bacolod Immigration Field Office, nagadangat na sa 517 ang nag-apply sang SSP humalin Enero 1 tubtub Pebrero 28 subong nga tuig.
Sa bilog nga tuig 2017, nagdangat sa 1, 621 ang nag-apply sang SSP sa Immigration Bureau.
Sa interview sang Bombo Radyo, ginpahayag ni Mita Chuvy Arguelles, alien control officer sang Bacolod Immigration Field Office, nga nagapanguna sa pinakamadamo nga nag-apply sang SSP amo ang mga Koreans, ginasundan sang Japanese kag Vietnamese.
Suno kay Arguelles, ginalauman nga magadamo pa ang numero sang mga foreign nationals nga magaeskwela diri sa bulan sang Mayo nga amo ang ginakabig peak season, bulan sang Oktubre kag Disyembre.
Nahibaluan nga antes makaeskwela ang isa ka foreign national, kinahanglan sini nga magkuha sang SSP kag iga-grant lamang kun accredited sang Immigration Bureau ang eskwelahan.
Sa karon, madasig nalang ang approval sang SSP bangud sa computerized system sang BI.
